|
عرفانی ادبیاتیمیزین ذیروسینه غرور لا قونان اولو یونوس امره نین اردیجیل گلن داوامچی لاری، آری روحلو، درویش خویلو عارف لر هر چاغدا گونش کیمی پارلایاراق ائلی میزی اوبامیزی ایشیقلاندیریب، سلف لرینه صادق قالاراق،خلف لرینه اورنک اولاراق، سویله دیکلری اویودلرله و یازدیقلاری اثرلرله بیزلری رنگین و زنگین بیر خزینه یه مالک ائتمیشدیلر. بو زنجیرین بیزه یئتیشن سون حلقه لریندن ساییلان اره نلردن بیری ده عاشیق ویسل شاطر اوغلودور.
بوتون شعرلرینده آتا، بابالاریمیزین حکمتلی سوزلری نین اییی دویولان اوزانین شعرلرینده ، حق سِوَرلیک ، طبیعتمیزه اوخشایان رنگارنگ لیک، ائلیمیزه یاراشان ایگیدلیک، کووره کلیک، دویغوساللیق گوزه چارپیراورنگ اولاراق یونس امره سایاغی نه گوزل بیر شعرده حقی اویور
ساخلارام گوزومده گوزه ل لیینی
هرنه یه باخارسام سن وارسان اوردا
قلبده گیزلریم صحبت ینی،
قویمام یابانجی نی سن وارسان اوردا.
یا خود: قلبیمده یاشارسان هر آن
واریم ، یوخوم سنسن اینان
قلبیمده کی عزیز مهمان
سن اولماسان من اولمازدیم
وارلیق بیرلیگینه ( وحدت وجود) ایناناراق بوتون یارانانلاری بیر واحد وارلیقدان آیریلیب ، دنگ و برابر بیر حقوقا مالک اولمالاری هئج یارادیلمیشین باشقاسیندان اوستون اولماسینی دیله گتیررک، اوستون سویلوغو ( برتری نژادی)مذمت ائدیب ، قیناییر:
قرآنا باخ اینجیله باخ
دورت کیتابین دوردوده حاق
حقیر گوروب عیرق آییرماق
حقیقتده اوز قاراسی
دوستاغین قاپانماسینی، خیانت ین اولماماسینی ، حقین رضاسینی و دامونون جزاسینی ایشده حیله و سوزده یالان اولماسیندان آسیلی گورور:
اورتادان قالخاردی گوناه مصیبت
آشکار اولور دو حق و حقیقت
هر کس اوچون آچیق اولوردو جنت
ایشده حیله، سوزده یالان اولماسا.
چئشیدلی میوه لر یئتیرن، چورک، برکت وئرن قارا توپراغا اورکدن باغلیدیر.
بوتون قصور لاریم توپراق گیزله ییر،
مرهم چالیب یارالاریم دوزله ییر،
قولون آچمیش یوللاریمی گوزله ییر،
منیم صادیق یاریم قارا توپراقدیر،
درویشی دیلنچی حدینه ایندیریپ، ابدالی . اپتالا چئویرن دورال عرفانی قیناییب ال آیاغیندا اولان دب لره قارشی چیخاراق، دینی دیرلریمیزی و یارارلی رسم لریمیزی قوروماقلا برابر زامانین علمی ایله آیاق اولوب ، غافیل اولمامامیزی، باتی لیلاردان گئری قالمامامیزی توصیه ائدیر و دینامیکی بیر عرفانی تبلیغ ائدیر:
بو ایشلر بیر عبرت دئییل می بیزه
گوک لره فیرلاییر بو قدر فوزه ( موشک)
ایسته ییر آی داکی سیرلاری چوزه
اویان غفلتدن اویوما یورتداش
یادلارین، یابانجی لارین قوردوغو توزاق و حیله لر له بیربیرینه دوشمان ائدیلن دین داشلاری و قارداشلاری ، یوکسلمه نین اوزولو اولان دوشونمه و بیرلشمه یه چاغیریری
هدف آلیپ دؤووشدوغون قارداشین
سنی یارالایار آتدیغین داشین
توپلوما ضررلی یئرسیزساواشین
هپیمیز بویوردون ائولادلارییق
عرفانی شعر نین اوزه للیی یاشایشیندان قیدالانیر. مادی دونیا یا سای سالماییب حقین وئردیغینه رضا و باغشلامادیغینا حکمت گوزیله باخیر.
اونون گورمز گوزلرینه، دوکتورلرین معالجه ایله ایشیق قایتارما توصیه سینده:
( دوزدور، سیز گورنلری من گورمه ییرم، اما من گورنلری ده سیز گورمز سینیز) وئرن جوابی، و اصل و بصیرت گوزو آچیق اولان بیر عارفین یالنیز یانیتی اولابیلر.
سانا اوزانان ال اولدوم
گاهی اوسلو گاه دلی ) اولدوم
عاجزانه ویسل اولدوم.
سنین یولوندا، یولوندا
بو اره نلرین دوستونو بیر شعریله
خاطیرلایاراق،
من گئدرم آدیم قالیر
دوستلارمنی خاطیرلاسین
دویون اولور، بایرام گلیر
دوستلارمنی خاطیرلاسین
جان قفسده دور ماز اوچار
دونیا بیر خوان قوناق کوچر
آی دولانیر ایللر کئچر
دوستلارمنی خاطیرلاسین
جان بدندن آیریلاجاق
توتمز باجا، یانماز اوجاق
سلام اولسون قوجاق، قوجاق
دوستلارمنی خاطیرلاسین
نه گلردیم نه گئدردیم
گوندن گونه آرتدی دردیم
غریب قالیر یئریم، یوردوم
دوستلارمنی خاطیرلاسین
آخارسولار تورلو چیچک
کیملر گولموش، کیم گوله جک
موراد یالان اولوم گرچک
دوستلارمنی خاطیرلاسین
گون ایکیندی آخشام اولور
گورکی باشا نه لر گلیر
ویسل گئدر آدی قالیر
دوستلارمنی خاطیرلاسین
سیامک حسینعلیزاده
|
